पुन्हा "जन्म" घेण्या जुगारी निघाला....

सुऱ्याने कधी ना इथे वार केला
सुरा मैफलीचा जिव्हारी निघाला

भला पाहिला आज गोपाळकाला
कसा "कंस" तो ही "मुरारी" निघाला

किती "न्याय" देण्या झटे न्याय दाता !
गुन्हे शोधण्याला फरारी निघाला

दुखी मी - कशाने ? कळावे कुणाला !
तिचा हुंदका व्यवहारी निघाला

तुझा हात खांद्यावरी आज माझ्या
नको वाटणारी शिसारी निघाला

फकीरीत आले समाधान हाती
अमीरीत "जो" "तो" भिकारी निघाला

पुन्हा ठेच पायी सुशोभीत झाली
तिचा उंबराही करारी निघाला

डसावे कुणीही भिनावे कुणीही
इथे गारुड़ीही विषारी निघाला

इथे घात होतो कुठेही कसाही
इथे "माणसा" तू शिकारी निघाला

करोनी घराची सदा बंद दारे
"विवेकी" निघाला - "विचारी" निघाला

फिरोनी पुन्हा त्याच त्या लाख "योनी"
पुन्हा "जन्म" घेण्या जुगारी निघाला

मयुरेश साने..दि ३०-सप्टेम्बर -१०