स्पर्शात वेदनेचा अंगार साहिला मी.............

डोळ्यातुनी व्यथेचा हुंकार वाहिला मी
स्पर्शात वेदनेचा अंगार साहिला मी

ओल्या सुरात माझ्या ठेऊन गीत वेडे
कंठात जीव घेणा गंधार गाईला मी

व्याकूळ कोण येथे त्यांना कसे कळावे ?
चोचीत चातकाच्या मल्हार पाहिला मी

देतील ते उद्याला आश्वासने उद्याची
अत्ताच रोख त्यांचा सत्कार पाहिला मी

घायाळ मी जराही प्रेमात होत नाही
तो वार ही जरासा अल्वार साहिला मी

मयुरेश साने...दि १४-अक्टूबर-10