का गझल होत नाही फसवून ओळ जाते ?

लाऊन आस वेडी सुचवून ओळ जाते
शब्दास अर्थ काही देऊन ओळ जाते

दु:खातही सुखाच्या लिहितोय चार ओळी
मजलाच रोज माझी हसवून ओळ जाते

मुडदाड काळजाला सुचते कधी अचानक
चटका मनामनाला लाऊन ओळ जाते

लपवू नकोस अश्रू सांगून टाक सारे
तो हुंदका कुणाचा गाऊन ओळ जाते

उपरोध सांगणार्‍या हसर्‍या हुशार ओळी
हलकेच पापणीला भिजवून ओळ जाते

वाचून बातम्यांना पदरात काय पडते
घडणार जे उद्या ते घडवून ओळ जाते

सुचतो रदीफ मजला सुचतात काफियेही
का गझल होत नाही फसवून ओळ जाते ?

मयुरेश साने.